Kryetari i Partisë Demokratike, Lulzim Basha tha sot në Kuvend, ka bërë një deklaratë të fortë, duke u shprehur se një ministër i Ramës i ka dërguar banditë dhe ka kërcënuar një biznesmen shqiptaro-amerikan.
Duke u shprehur i hapur për hetime ndaj pretendimeve të lidhjeve të dyshuara të PD-së me rusët, Basha kërkoi ngritjen e një komisioni hetimor parlamentar për të zbuluar influencat e vërteta ruse në Shqipëri.
Lulzim Basha – Edi Ramës: “Nëse prokuroria nuk do të ishte e kapur nga ty, duhet të kishte hapur hetim për një ministrin tënd që krekoset aty, që i ka nisur banditë në emër të “Juremexit” dhe të Rusisë, një investitori shqiptaro-amerikan.
Po kështu, Abi Bank ku shërben bashkëshorjta jote ka kapital rus, 540 milionë Euro nga Kremlini. Por po deshe hajde bëjmë një hetim parlamentar për influenca ruse në Shqipëri të shikojmë se ku i ka futur kthetrat ariu”.
Edi Rama – Lulzim Bashës: “Nuk i ikën dot kësaj duke thënë të bëjmë komision parlamentar dhe të hetojmë Abi Bank. Abi Bank është investimi më i madh amerikan në vend. Del këtu për të sfiduar qeverinë dhe s’di çfarë flet. Mund të bësh për budallenj vetëm ata që duan të bëhen për budallenj. Shqiptarët për budallenj me këto lloj muhabetesh nuk i bën dot. Po e biodegradoni partinë e alternativës. Sa më shumë vrapon që t’i ngjitesh LSI-së, aq më shumë tregon se në çfarë situate të biodegradimit është partia jote. Nuk është kritikë për LSI-në, është për ju, se LSI nuk ka vizion, ka pozicion“.
Lulzim Basha – Edi Ramës: “Sa për çështjen e Abi Bank dhe influencës ruse mbi Abi Bank, dhe për porositjen e killerave shqiptarë për kërcënimin e investitorëve shqiptaro-amerikanë, këtu jemi dhe kemi kohë t’i shkojmë deri në fund”.
