Nënkryetarja e LSI-së dhe njëkohësisht kandidatja për deputete, Monika Kryemadhi, me anë të një statusi në “Facebook”, ka akuzuar deputetin socialist Taulant Balla lidhur me incidentet e fushatës në Elbasan.
Sipas Kryemadhit , deputeti Balla po shoqëron në polici qytetarë të pafajshëm të cilët janë mbështetës të LSI-së.
Më tej, nënkryetarja e LSI-së shprehet se për gjatë muajit të fundit janë shoqëruar në polici 300 të rinj, kryesisht gjimnazistë, vetëm që ata mos të jenë të lirë ditën e votimit.
Statusi i Monika Kryemadhit
“Shpreh keqardhjen që Dega e Rilindjes në Elbasan, me një gjuhë të papërshtatshme dhe e frikësuar për rezultatin e pritshëm të zgjedhjeve më akuzon mua dhe bashkëpunëtorët e mi për incidente që mbajnë autorësine e disa rilindasëve që drejtohen nga Taulant Balla. Këtij të fundit i kujtoj dhe njëherë se çdo përpjekje për të ndaluar dhe shoqëruar në polici njerëz të pafajshëm është krejt i kotë sepse çdo votues i qarkut te Elbasanit, do apo nuk do Taulanti apo levat e tij në policinë e shtetit, do ta shprehë vullnetin me votën e lirë. Prej një muaj deputeti Balla ka denoncuar të paktën 300 të rinj,kryesisht studentë dhe gjimnazistë apo dhe të moshuar të njohur si përkrahës të LSI,vetëm e vetëm që ata mos të jenë të lirë ditën e votimit. Sikundër ka vijuar i qetë të shoqërohet nga kriminelët që lëvizin me makina të blinduara dhe pa targa dhe kërcënojnë çdo ditë qytetarët. Çdo përpjekje për të trembur të moshuarit apo gjimnazistët është e kotë, çdo tentativë për të arrestuar të pafajshëm është një farsë, sepse sado pushtet të kesh, popullin nuk e arreston dot.
Ne distancohemi nga deklaratat e Taulant Ballës dhe i kujtojmë se bandë kriminale nuk janë të rinjtë e LSI por banda e tij e kryesuar nga kryetari i bashkisë së Librazhit Kastriot Gurra që ushtron shantazhe deri me jetë, apo ish truproja e tij që sot është nënkryetari i bashkisë së Librazhdit Avni Mema, apo për shpërndarjen e parave që kryesohet nga Kasem Balla ,babai i deputetit dhe Vladimir Balla, vellai i Taulantit. I kujtoj Taulantit kryetarin e bashkisë së Belshit që dhe sot kërcënon njerëzit në qendrat e votimit, apo kamionin me miell që u kap duke u shpërndarë miell zonave te varfra në Gramsh në këmbim të votës.
Ndaj sot Taulantit dhe falangave të tij në policinë e shtetit më duhet ti paralajmëroj për herë të fundit të qendrojnë larg votuesve dhe vullnetit të tyre, sepse kjo është një ditë e shënuar për popullin shqiptar. Dhe askush, sado të abuzojë me pushtetin dhe forcën nuk do mund ta prishë dot. Vullneti i popullit të Elbasanit është sot në kutitë e votimit dhe çdo votë do të numërohët si vendimi i qytetarëve për të larguar krimin nga policia dhe politikën nga krimi. Eh mor Taulant, nga kërkimi i motrës vajte te kërkimi i votës.
Prandaj po të përshëndes me “Taulanti kërkon motër”
