Ish-deputeti i PD-së, Luan Baçi ka folur rreth ngjarjes së fundit të ndodhur në Fier, ku pati një përplasje me armë mes dy grupeve në Levan.
Në një intervistë për FaxNews, Baçi u shpreh se njëra palë e përfshirë në konflikt u ndihmua nga ana e policisë, teksa shtoi se e gjithë ngjarja u mbajt tërësisht në terr informativ.
Baçi akuzon kreun e Bashkisë Fier, Armando Subashi, se ka ndërhyrë te drejtuesit e policisë për të hedhur fajin vetëm te një, nga grupet e përfshira në konflikt.
“Ashtu siç e kam thënë dhe në rrjetet sociale, më të rëndë cilësoj reagimin e strukturave të shtetit. Arma e policit u përdor nga njerëz të papërgjegjshëm, reagimi i policisë ka qenë politik, rrethoi spitalin në një shtetrrethim të plotë, për arsye se kërkonte që të hidhte fajin në vetëm njërën anë të palëve të përfshira.
Ka një terr informative për këtë çështje, ka punonjës policie që ende ruajnë dy persona me mbiemër Zhapaj, në spitalin e Fierit. Ka ndërhyrje politike për të manipuluar ngjarjen, ku familjarët akuzojnë kryebashkiakun Subashi për ndërhyrjen, e ka shpallur veten perandor”, u shpreh Baçi.
Kujtojmë se e gjitha kjo erdhi si pasojë e një sherri mes dy familjeve më 31 gusht në Levan, ku mbetën të plagosur 5 persona.
Sherri nisi mes dy familjeve në Levan, familjes Zhapaj dhe Braçe. Më tej konflikti vijoi edhe në ambientet e Urgjencës së Spitalit, ku një prej autorëve i mori armën efektivit të patrullës dhe qëlloi mbi Aleksandër Zhapajn.
