Situata nga koronavirusi është përkeqësuar ndjeshëm edhe në Belgjikë, teksa në 24 orët e fundit janë regjistruar 303 viktima.
Kështu numri total i viktimave nga COVID-19 në Belgjikë ka shkuar në 3,903. Sa i përket numri të rasteve, 942 raste të reja janë regjistruar sot duke e çuar në 30,589 numrin e të prekurve në vend.
Megjithëse numri mund të duket i ulët, në krahasim me vendet e tjera evropiane, popullsia e Belgjikës është vetëm rreth 11.5 milionë.
Gjermania ka një popullsi prej rreth 83 milionë, dhe ka regjistruar rreth 3,022 vdekje, domethënë proporcionalisht, numri i vdekjeve për kokë banori i Belgjikës është më afër Spanjës dhe Italisë.
Deri më tani në Belgjikë janë shëruar 6,707 persona, ndërsa 1,234 pacientë ndodhen në gjendje kritike për jetën.
Belgjika renditet kështu e shtata me numrin më të madh të viktimave nga COVID-19, pas SHBA-ve, Italisë, Spanjës, Francës, Mbretërisë së Bashkuar dhe Iranit.
Mbi 1,8 milionë njerëz nga e gjithë bota janë prekur nga koronavirusi, ndërsa më shumë se 115 mijë persona kanë humbur jetën.
