Ish-ministri i Brendshëm Saimir Tahiri ka paralajmëruar kryeministrin Rama që të bëjë kujdes nga arroganca. Duke folur në Asamblenë Kombëtare të PS-së, i “përjashtuari i madh” nga qeveria “Rama 2”, Saimir Tahiri, aktualisht me funksionin e koordinatorit kombëtar për bashkëqeverisjen me njerëzit, bëri një apel ndaj ministrave dhe kryeministrit vetë që të afrohen më shumë me njerëzit dhe të mos pushtohet nga arroganca. Por kjo, sipas tij, bëhet duke luftuar rrugët e shkurtra, siç janë korrupsioni dhe rruga e tarafit, mikut.
“Sa më e gjatë koha në pushtet aq me e madhe bëhet arrogance. Ne fituam të gjithë bashkë, tani kemi qeveri, struktura, ligje, fituam vetëm me njerëzit kur e kishim shumë më kollaj të qeverisnim me partitë. Ne e bëmë zgjedhjen e duhur që na bën me përgjegjësi më të madhe dhe punët na i bën më të vështira. Ose të mbyllim sytë për njëri- tjetri, ose të çlirohemi nga gjithçka që është pengesë për njerëzit. Kryeministri hapi dje një dritare jo të vogël, por nëse shfrytëzohet sikur duhet mund të jetë rruga e jonë me e mirë. Ti bindim se e kemi seriozisht kur t’i dëgjojmë njerëzit”. – tha Tahiri.
