Prokurorja e Përgjithshme, Arta Marku, i ka dërguar një kërkesë Prokurorisë që të nisë vlerësimet, referuar përhapjes së lajmit fals për tërmetet. Ajo po kështu ka kërkuar informacion në lidhje me mënyrën e trajtimit të materialit. Kujtojmë këtu se mbrëmjen që lamë pas, u përhap në mënyrë virale lajmi se një tërmet i fuqishëm do godiste vendin në orën 23:30. Kaq mjaftoi që të përhapej paniku, dhe njerëzit të dilnin në rrugë, e shumë të tjerë të largoheshin të tmerruar nga Tirana.
Njoftimi i plotë:
Prokurorja e Përgjithshme znj. Arta Marku kërkoi nga Prokuroria pranë Gjykatës së Shkallës së Parë Tiranë, vlerësimin e menjëhershëm ligjor në lidhje me dyshime për përhapjen në publik të informatave/njoftimeve të rreme që ngjallin panik dhe pasiguri tek qytetarët.
Në mbështetje të neneve 38 dhe 50/1 të Ligjit nr.97/2016 ”Për Organizimin dhe Funksionimin e Prokurorisë në Republikën e Shqipërisë”, pa cënuar sekretin hetimor Prokurorja e Përgjithshme znj. Arta Marku kërkoi gjithashtu informacion në lidhje me mënyrën e trajtimit të materialit.
