Kryeministri Edi Rama ka folur për përgjimet e publikuara nga “Bild, ndërsa ka akuzuar opozitën për nxjerrje të sekretit hetimor. Ai tha se prokurorët dhe gjyqtarët e rinj që do dalin pas procesit të Vettingut, do t’i thërrasin para drejtësisë ata që kanë nxjerrë përgjimet.
“Lidhur me ato përgjimet e neveritshme, sepse nga njëra anë askush nuk mund të çohet dhe të thotë se ne kemi hapur gojën, lere të kemi ngritur dorën, për të penguar drejtësinë.
Askush nuk na ka parë të marrim në mbrojtje këdoqoftë, por ia kemi lënë drejtësisë të vendosë. Ndërkohë që në aspektin moral, ata që na akuzojnë dhe helmojnë çdo ditë gjakun e këtij mileti, janë ata të cilët, Drejtorin e Përgjithshëm të Tatimeve e kishin të dënuar me arrest shtëpie, dhe e çonin përditë dhe e ulnin si të pafajshëm, dhe drejtonte Tatimet me pranga në duar nga shtëpia”.
Rama mbështeti deklaratën e drejtueses së Prokurorisë së Krimeve të Rënda, Donika Prela, duke thënë se ajo shpjegoi me ekzaktësi gjithçka ka ndodhur me dosjen 339.
“Po dëgjoja kryeprokuroren, më shumë vonesë për fat të keq, por ka shpjeguar ekzaktësisht arsyen pse këto zbulime të mëdha që janë abuzim i madh me ligjin dhe nxjerrjen e sekretit hetimor, për tu përdorur për politikë dhe kundër Shqipërisë, ndërkohë që duhej të kishte perfunduar hetimi me kohë.
Dëgjoni kush janë personat që i kanë mbajtur në sirtar këto zbulime… ata i kanë çuar te partia për ti përdorur dhe për të shantazhuar këtë qeveri. Sepse ata i bashkojnë shumë gjëra, por edhe lufta kundër reformës në drejtësi.
Prokurorë që tmerrohen nga Vettingu dhe politikanë që tmerrohen nga gjyqe që i presin nga ata që do kenë kaluar Vettingun, do t’i thërrasin para drejtësisë, sepse nuk harrohen të gjitha ato që kanë ndodhur”, deklaroi Rama.
