Kreu i Bashkisë së Durrësit, Vangjush Dako ka reaguar pas akuzave të kreut të PD-së, Lulzim Basha se emri i tij rezulton në përgjimet e EULEX-it.
Teksa ka marrë sot pjesë në aksionin për pastrimin te Ura e Dajlanit, Dako ka mohuar të jetë i përfshirë në pazare votash.
“Nuk ka asnjë gjë të vërtetë nga çfarë thuhet për mua. Opozita kërkon të baltosë punën tonë dhe do të pengoje objektivat tona. Unë e kam thënë edhe në reagimin tim në Facebook, se nuk më trembin këto thashetheme dhe do përballem po të jete nevoja.
Dua t’u shërbej me devotshmëri atyre që kanë besuar tek unë”, ka thënë Dako.
Kreu i Partisë Demokratike, Lulzim Basha deklaroi para 4 ditësh se kreu i Bashkisë së Durrësit, Vangjush Dako është përgjuar në telefon duke bërë pazare për blerjen e votave.
Basha tha se Dako mbrohet nga Rama, ndërsa i bëri thirrje prokurorëve që të hetojnë lidhur me ngjarjen.
Po ashtu, deputeti paralajmëroi se emra të tjerë të përfshirë në skandale do të publikohen së shpejti, ndërsa shtoi se peshqit e mëdhenj kanë rënë në rrjetë.
FJALA E BASHËS:
Blerja masive e votave u konfirmua nga raporti i OSBE ODIHR.
Sot po ju prezantoj një tjetër zhvillim skandaloz. Vangjush Dako është kapur në flagrancë duke bashkëpunuar me grupet kriminale të Durrësit duke iu kërkuar të vjedhin votat për zgjedhjet.
E kanë kapur duke bërë pazare ne telefon, në këmbim te votave Dako iu premton qytetarëve miliona euro.
Këto pazare të ndyra janë të dokumentuara dhe janë nën hetim nga prokuroria e krimeve të rënda.
Për këtë arsye ata ndërhynë fuqishëm për të larguar nga hetimi prokurorin që po hetonte këtë aferë kriminale të interceptuar nga shërbimet inteligjente përfshirë ato të vendeve partnere. Me presionin kriminal ai ka larguar prokurorin Anton Martini nga hetimi i çështjes, i cili është graduar drejtue4s në Prokurorinë e Shkodrës, me shpresën e vetme të Ramë për të shpëtuar Gjushin nga prangat.
Kjo është arsyeja e dorëheqjes së papritur të shefit të shërbimit inteligjent. Rama është hedhur në sulm për arsye të tjera për të shpëtuar Gjushin.
Prokurori që po heton vjedhjen spektakolare të votave në Durërs po hetohet në Shkodër. I kërkoj Llallës t’u thotë qytetarëve nëse levizja e prokurorit Martini është bërë nën presionin e Edi Ramës dhe kërkoj hetimin për këtë çështje skandaloze nga Prokurorët e Krimeve të Rënda.
PD do të vazhdojë përpjekje për të çmontuar lidhjet kriminale të Ramës. Tani, Rama po mundohet të mbrojë Dakon nga prangat, mbron Dakon sepse kështu mbron veten e tij.
Rama po ndjen t’i afrohen prangat për zullumet që ka bërë. PD është e vendosur në betejën e saj për largimin e Edi Ramës dhe çlirimin e Shqipërisë nga krimi. Peshqit e mëdhenj kanë rënë në rrjetë.
