Sapo ka përfunduar seanca e sotme ndaj Saimir Tahirit.
Vendimi i Gjykatës së Apelit për ish-ministrin e Brendshëm, Tahiri do të merret më 24 Qershor.
“Ne folëm tani, do të flasi gjykata, ajo që dini i keni parë kshu që nuk ja vlen të zgjatem. Kursejani njerëzve këtë historinë komike të gjyqit tim se është bërë qesharake. Unë nuk kam folur gjithë kohës që kam qenë i akuzuar për të respektuar drejtësinë, e kam bërë për të respektuar raportin tim me drejtësinë. Saimiri Tahiri nuk ka ikur, kjo historia e politikës nuk mund të tundon dhe kur nuk më tundoi lënia e mandatit nuk më tundon as kjo. Çmimi i karrierës së prokurorëve nuk kalon mbi jetën time”, u shpreh Tahiri.
Ai ka qenë i shoqëruar në seancën gjyqësore nga avokati i tij Maksim Haxhia.
Kujtojmë se vitin e kaluar Saimir Tahiri u dënua me 5 vite burg të konvertuara me gjykim të shkurtuar në 3 vite e 4 muaj shërbim prove dhe dënimi u dha për shpërdorim detyre.
Prokuroria e Krimeve të Rënda nga ana tjetër kërkonte 12 vite burg për Tahirin për 3 vepra penale “trafikim i narkotikëve” në bashkëpunim në formën e grupit të strukturuar kriminal, “kryerja e veprave penale nga organizata kriminale”, “grup i strukturuar kriminal”.
Si përfundim të dyja palët, si Tahiri dhe Prokuroria nuk pranuan dënimin me 3.4 vite shërbim prove dhe e apeluan zyrtarisht në Gjykatën e Posaçme të Apelit.
