Ministrja e Shëndetësisë, Ogerta Manastirliu së fundmi priti në një takim grupin e mjekëve italianë, të cilët për 2 javë ofruan veprimtari konsulence për homologët shqiptarë në luftën kundër koronavirusit.
Manastirliu i falenderoi mjekët për kontributin e tyre ndërsa pohoi se bashkëpunimi do të vijojë edhe në misione të tjera.
“Vetëm nëpërmjet solidaritetit dhe veprimeve të unifikuara do të mund ta fitojmë luftën me virusin e rrezikshëm.
Eksperienca juaj në spitalet COVID dhe këshillat konkrete për organizimin spitalor janë të vyera dhe ndihmojnë strategjinë tonë të përgjigjes së sistemit shëndetësor ndaj situatës, me planin e vjeshtë-dimrit që ne kemi përgatitur për të përballuar një rritje të mundshme të numrit të rasteve.
Unë jam e bindur se ky mision nuk do të jetë i vetmi, por bashkëpunimi ynë do të vijojë edhe në misione të tjera”, u shpreh ministrja.
Rikujtojmë se dy javë më parë, Task-Forca e Emergjencave Civile italiane e përbërë nga shtatë ekspertë erdhi në Shqipëri në mbështetje të vendit tonë në përballimin e situatës së shkaktuar si pasojë e COVID-19.
