Ambasada shqiptare në Athinë, ka reaguar për herë të parë për shkarkimin e ambasadores aktuale Ardiana Hobdari. E pyetur nga BalkanWeb, në një reagim zyrtar ambasada shqiptare në Athinë sqaron se nuk ka njoftim zyrtar nga Ministria e Punëve të Jashtme apo ndonjë institucion tjetër. Në reagimin në fjalë thuhet se procedura për dekretimin dhe ç’dekretimin e ambasadorëve, është e përcaktuar nga Kushtetuta e RSH dhe Ligji për Shërbimin e Jashtëm.
“Përshëndetje. Konfirmojmë se nuk ka asnjë njoftim zyrtar për sa i referoheni. Njëkohësisht, sqarojmë se procedura për dekretimin dhe ç’dekretimin e ambasadorëve, është qartësisht e përcaktuar nga Kushtetuta e RSH dhe Ligji për Shërbimin e Jashtëm. Me respekt, Ambasada e RSH Athinë”, shkruhet në reagim.
Një ditë më parë, Cakaj shkarkoi ambasadoren shqiptare në Greqi, Ardiana Hobdari, dhe disa zyrtarë të tjerë, pas ankesave të shumta nga emigrantët. Sipas mediave greke, Hobdari është përfshirë në çështjen e humbjes së 100 pasaportave diplomatike një vit më parë, ngjarje e ndodhur në shkurt të vitit 2019.
Sakaq, Luela Hajdaraga është propozuar nga Ministri për Punët e Jashtme Gent Cakaj, si ambasadore e Shqipërisë në Athinë.
Hajdaraga është vajza e ish-ministrit socialist, Luan Hajdaraga, i cili e mbajti këtë post gjatë kohës së qeverisjes së Fatos Nanos. Ish-ministri është ndarë nga jeta pak kohë më parë, për shkak të një sëmundje të rëndë.
