Gjykata e Apelit të Tiranës la në fuqi vendimin e Gjykatës së Shkallës së Parë ndaj noteres Rezarta Koçi, duke qëndruar ende në burg. Ajo akuzohet se ka mashtruar shumë qytetarë duke përvetësuar shuma në vlerë miliona euro nga qytetarë të ndryshëm. Nga denoncimet e shumë qytetarëve, Koçi premtonte shitje të banesave.
Ndaj saj janë ngritur akuzat “mashtrim”, “vjedhje” dhe “shpërdorim detyre”. Gjykata e Shkallës së Parë të Tiranës caktoi masën “arrest me burg” në 5 shkurt të këtij viti.
Rezarta Koçi u bë e njohur në media, pasi iu vendos tritol në automjetin e saj “Range Rover” në datën 6 nëntor 2021.
Hetimet kishin nisur pas 4 kallëzimeve që ishin bërë nga qytetarë te ndryshëm ndaj noteres, por sipas informacioneve, ajo është arrestuar vetëm për një prej tyre, ku ishte kallëzuar për “mashtrim”.
Nga hetimet ka rezultuar se noterja 40-vjeçare, gjatë kohës që përgatiste dokumentacionin, nuk hapte llogari të ngrirë bankare për transferimin e parave nga pala blerëse tek ajo shitëse, por në kundërshtim me ligjin përdorte llogarinë e saj personale.
Referuar kallëzimeve, numri i qytetarëve te mashtruar nga noteria është mjaft i lartë, ku shumat që ajo ka përvetësuar kapin vlera te majme.
