Kuvendi është mbledhur në seancën e radhës planare, ku kanë filluar diskutimet dhe përplasjet e forta mes deputetëve. Seanca ka nisur me deklaratën e deputetit Halit Valteri, i cili propozoi rikthimin e dënimit me varje me litar, për të gjithë ata që abuzojnë seksualisht me të miturit. Propozimi i tij ka marrë menjëherë përgjigjen nga kreu i Kuvendit, Gramoz Ruçi, i cili u shpreh se ky problem nuk zgjidhet me propozimin e Valterit.
“Kemi parë një nismë që është marrë nga zonjat kolege, dhe është për manifestimin në orën 16:00 për fëmijërinë e vjedhur. I bëj thirrje zotit Balla, kush është pedofil të varet në mes të qytetit. Ta rikthejmë dënimin me vdekje, se këta maskarenj nuk e meritojnë të jetojnë, por të zhduket nga faqja e dheut”, tha Valteri.
Në përgjigje të tij, kreu i Kuvendit, Gramoz Ruçi tha se “kjo nuk është një zgjidhje”. ” Nuk e zgjidh kjo, në dijeninë time, sot në seancë do të ketë reagim nga ana e Ministres së Arsimit”, tha Ruçi.
Në vijim, deputetët kanë filluar edhe interpelancën me Ministrin e Brendshëm, Sandër Lleshaj dhe do të pasohet me diskutimet e tjera, në lidhje me përplasjet e policisë me protestuesit pas shembjes së Teatrit Kombëtar.
