Gjykata Kushtetuese ka dhënë vendimin për përplasjen ndërmjet kryeministrit Edi Rama dhe Presidentit Ilir Meta, lidhur me kompetencat e këtij të fundit për emërimin e ish-Ministrit të Punëve të Jashtme, Gent Cakaj.
Kushtetuesja vendosi pranimin e pjesshëm të kërkesës, teksa bëri të ditur se ka kërkuar pushimin e çështjes ndërmjet tij dhe Metës.
Sipas Kushtetueses, kompetenca për emërimin apo shkarkimin e një ministri, ndahet midis 3 organeve, të cilat janë Kryeministri, Presidenti, dhe Kuvendi. Ndër të tjera, në vendim thuhet se procesi i emërimit të ministrit duhet të garantoje përmbushjen e kritereve dhe cilësive kushtetuese për këtë funksion.
VENDIMI
Gjykata Kushtetuese e Republikës së Shqipërisë, mori në shqyrtim në seancën plenare të datës 18.05.2021, çështjen me kërkues Kryeministri i Republikës së Shqipërisë, me objekt: “Zgjidhja e mosmarrëveshjes së kompetencave ndërmjet Kryeministrit të Republikës së Shqipërisë dhe Presidentit të Republikës së Shqipërisë. Interpretimi i nenit 98, pika 1 të Kushtetutës së Republikës së Shqipërisë”.
Në përfundim të shqyrtimit, Gjykata Kushtetuese, njëzëri, VENDOSI:
– Pranimin e pjesshëm të kërkesës.
– Pushimin e gjykimit për kërkimin mbi zgjidhjen e mosmarrëveshjes së kompetencës, ndërmjet Kryeministrit dhe Presidentit të Republikës së Shqipërisë.
– Interpretimin përfundimtar të nenit 98 të Kushtetutës, për sa vijon:
– Në procedurën e emërimit dhe shkarkimit të ministrit, Kryeministri, Presidenti dhe Kuvendi, udhëhiqen nga parimi i luajalitetit kushtetues dhe atij të ndarjes dhe balancimit të pushteteve.
– Kompetenca për emërimin dhe shkarkimin e ministrit ndahet ndërmjet tre organeve të mësipërme.
– Procesi i emërimit të ministrit duhet të garantoje përmbushjen e kritereve dhe cilësive kushtetuese për këtë funksion.
– Vlerësimi dhe verifikimi i kandidatit për ministër, bëhet nga të tre organet e përfshira në proces, secili sipas rolit dhe kompetencave të tij kushtetuese, brenda afateve kushtetuese, në përputhje me arsyetimin e këtij vendimi.
Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar.
Në vitin 2019, kryeministri Edi Rama propozoi si zëvendësuesin e Ditmir Bushatit, Gent Cakajn, dhe emri u dërgua për dekretim tek presidenti Ilir Meta.
Por, Kreu i Shtetit ktheu dekretin për Gent Cakajn duke e konsideruar atë të papërshtatshëm për këtë detyrë. Për shkak të kësaj përplasjeje me Metën, Rama mbajti edhe postin e Ministrit të Jashtëm edhe të Kryeministrit, ndërsa Cakaj u quajt “ministër i deleguar”, por jo me peshë ligjore.
