Një apel që të prek në zemër vjen këtë herë nga familja e Fadil Hoxhës, e cila jeton mes skamjes në fshatin Mihanjas të njësisë Bërzhitë.
Fondacioni Fundjavë Ndryshe ka publikuar pamjet skandaloze të kushteve të mjera ku jeton kjo familje, duke apeluar ndaj të gjithë shqiptarëve që të bëhen bashkë e të kontribuojmë sado pak për t’u ardhur në ndihmë sidomos fëmijëve.
Fadili ka 3 fëmijë nga 16 në 9 vjeç, ndërsa jetojnë me një ndihmë ekonomike prej vetëm 5700 lekësh të reja në muaj, ndërsa shtëpia e tyre është pjesërisht e shembur dhe nga momenti në moment rrezikon të shembet e tëra.
Veç skamjes, ata përballen edhe me sëmundje, të cilat bëhen edhe më të rënda për shkak të kushteve në të cilat jetojnë. Gruaja e Fadilit vuan nga epilepsia dhe nuk trajtohet me asnjë kurë. Me lot në s, kryefamiljarja lutet që ta ndihmojnë sadopak, vetëm për fëmijët, të cilët shpesh është detyruar t’i vërë në gjumë, me barkun bosh:
“Burrin e kam me zemër, vajzën me zemër, kushte s’kemi, të ardhme s’kemi, vetëm 50 mijë lekë që i kam marr në komunë. Ujin e mbush me krah, rrobat i laj të gjitha me duar. Duan 4-5 ditë të teren. Ka raste që kalamajtë kanë rënë pa ngrënë. I mbështjell kalamajtë me batanije, rrini sot se do hamë nesër… Nuk e dua më këtë jetë kështu. Kushdo të mundet, të vejë dorën në zemër, vetëm për fëmijët se unë nuk dua gjë. Vetëm për fëmijët, të jetojnë fëmijët e mi. Të kenë fëmijët një shtëpi të paktën, ose ndonjë çadër, nuk po themi kushte më të mira, vetëm një çadër të rrinë kalamajtë, se po na zë shtëpia brenda”, thotë bashkëshortja e Fadilit, nënë e tre fëmijëve.
https://www.facebook.com/FundjaveNdryshe/videos/835459626794069/
Ndërsa njëri prej fëmijëve thotë se në shtëpi “hyjnë gjarpërinjtë dhe këtu në dimër është shumë ftohtë”.
Familja ka frikë te flejë brenda, kur bie shi, apo fryn erë e fortë. Vetë Fadil Hoxha thotë se e kanë shumë problem banesën ku jetojmë, pasi gjysma e banesës është e rrënuar, e shembur.
“Kemi pas shumë frikë gjatë të shtunës, kur ishte ajo era e madhe se binin tjegullar dhe muret. Ajo nuk mban më. Shtëpia na është shembur, këtu na rrezikohet jeta, këtu nuk jetohet më në këtë shtëpi. Kalamajtë kanë shumë frikë për të ndenjur, për të fjet këtu. Ne kemi fjet të gjithë natën jashtë kur ishte era, nuk kemi çfarë të hamë, çfarë të veshin kalamajtë, rroba s’kemi.”
Rasti është publikuar edhe nga emisioni “Stop”, ndërsa në apelin e “Fundjavë Ndryshe”, shkruhet:
“Familja Hoxha në Mihanjas të Bërzhitës nuk ka më asnjë siguri për të jetuar në shtëpinë e vjetër gati në shembje. Çdo ditë flejnë me friken se nuk do të zgjohen më. Të pamundur dhe të pafuqishëm për t’i dhënë zgjidhje problemit ata na apelojnë me zërin që u dridhet dhe me shpresën se nuk do ti lëmë vetëm.
Bashkë i’a kemi dalë dhe do t’ia dalim”.
