Përmes një njoftimi të shpërndarë për mediat, Partia Demokratike ka pohuar se opozita do të takohet me ekspertët e Komisionit të Venecias më 10 shtator në orën 08:00 në ambientet e hotel “Rogner”, ndërsa përfaqësuesit nga radhët e PD-së dhe LSI-së janë dy ish-deputetët, Oerd Bylykbashi dhe Klajda Gjosha.
Delegacioni pritet të zbarkojë në Shqipëri nga data 9 deri më 11 shtator dhe do të ketë takime në Kuvend si dhe në Kryeministri. Po kështu, delegacioni i Komisionit të Venecias do të takohet dhe me Presidentin e Republikës, pa anashkaluar edhe opozitën e cila konfirmoi sot një fakt të tillë.
“Lidhur me lajmin e mbërritjes se ekspertëve të Komisionit të Venecias në Shqipëri, disa media, duke iu referuar një agjende të papërditësuar, kanë njoftuar se Komisioni i Venecias nuk do të takohet me opozitën. Në të vërtetë, takimi me PD dhe LSI është planifikuar të jetë në 10 Shtator, ora 08.00, në Rogner. Përfaqësues të opozitës në takim do të jenë Oerd Bylykbashi dhe Klajda Gjosha”, njofton zyra e shtypit në PD.
