Ish-deputeti i PD, Enkelejd Alibeaj, ka qenë i pari që komentoi krijimin e partisë së re të udhëhequr nga deputetja Rudina Hajdari. Ai tha se krijimi i të tilla partive politike, janë brenda logjikës demokratike, por në këtë rast mungon morali politik.
“Asnjë lloj komenti nuk kam. Në parim mund të them: shumë mirë që pas viteve ‘90 u arrit mundësia që kushdo mendon se mund të formojë parti, mund të garojë. Në planin politik, emrat që ju sapo thatë, deri dje ishin njerëz të zgjedhur prej demokratëve.
Para se të jesh politikan duhet të jesh i moralshëm. Iu ke thënë njerëzve se do jesh përfaqësues i juaj, por morali i përfaqësimit politik mungon në këtë rast”, tha Alibeaj.
Vajza e liderit të dhjetorit Azem Hajdari, e cila u fut në politikë nga Lulzim Basha, në zgjedhjet e 2017, vendosi të jetë lidere e një partie të re politike që synon të afrojë afër vetes shumë ish funksionarë të larguar nga PD.
Mbetet ende e paqartë se si do të garojë në zgjedhje partia “Bindja Demokratike”, pasi afati për regjistrimin e partive në zgjedhje skadon të martën, por kodi krijon mundësi edhe për garë me kandidatë të pavarur, regjistrimi i të cilëve ka afat deri në 13 maj.
