Sekretari i Përgjithshëm i PD, Gazment Bardhi, thotë se kryeministri Rama po riciklon të korruptuarit, pasi është i lodhur dhe pa ide.
Këtu i referohet ndryshimeve të fundit në qeveri. Bardhi duke e cilësuar Ramën si një dështim, shprehet se në vend që të ndihmojë financiarisht dhe të rrisë punësimin për shqiptarët, u siguron punë vetëm miqve të tij.
Rama njoftoi largimin e Gent Cakajt dhe emërimin në vend të tij të Olta Xhaçkës. Kreu i qeverisë bëri edhe një rikthim në qeveri, duke emëruar Niko Peleshin ministër të Mbrojtjes, pas vendit bosh të mbetur nga largimi i Xhaçkës tek Ministria e Jashtme. Lidhur me këtë vendim, Gazmend Bardhi shprehet se vendit nuk i duhen arnime të vjetëruara, por ndryshime.
Statusi
Nuk ka ndryshime në qeveri, ka riciklim të të korruptuarve për shkak të luftës mes klaneve në pushtet. Edi Rama është i lodhur, i vjetëruar, pa ide, pa ekip dhe i pafuqishëm për të ndaluar këtë luftë që dobëson ekonominë për interesa privatë. Në vend që të ndihmojë financiarisht dhe të rrisë punësimin për shqiptarët, Rama u siguron punë vetëm miqve të tij.
Edi Rama është një dështim. Ai është i paaftë të ndryshojë gjërat dhe vazhdon të bëjë keq e më keq. Vendit nuk i duhen arnime të vjetëruara, por i duhet ndryshim. Prej 8 vitesh Edi Rama ka ofruar veç dështime dhe një qeveri që kujdeset vetëm për veten.
Mjaft më! Është koha për të sjellë ndryshimin dhe shpresë të re në Shqipëri. Është koha për të zgjedhur një qeveri që kujdeset për njerëzit, jo për veten e saj.
