Krydemokrati Basha ka zbuluar se me gjasë opozita mund të rifillojë protestat. Në një intervistë në “Abc News”, kreu i PD-së u shpreh se opozita nuk është ajo që i nis protestat, por është ajo që i mbështet dhe i përkrah. Ai i mëshoi fort faktit se opozita është gati që të marrë përgjegjësinë e dërgimit të vendit drejt normalitetit.
Sa i përket situatës aktuale, ai tha: “Gjykoj se ka një numër të madh njerëzish që është e tejngopur me situatën. Opozita ka një rol kyç, për t’u treguar se ka një rrugë tjetër. Nuk do e zgjidhim çdo problem brenda ditës. Por, me planin tonë, vizionin tonë për një Shqipëri tjetër, ne jemi gati që të marrin përgjegjësinë për ta çuar vendin drejt normalitetit”.
Lulzim Basha deklaroi se është një bekim për Shqipërinë që ndodhet në zemër të Evropës, duke shtuar se “Evropa dhe SHBA-të na kanë ndihmuar edhe në ato fusha ku qeveria ishte mizerabël si testet”.
Ndërsa sa i përket mundësisë së një proteste të mundshme, kreu i opozitës nuk dha një përgjigje të qartë, por shtoi se opozita i mbështet protestat, dhe nuk është ajo që i “detyron” njerëzit të dalin të protestojnë.
“Opozita ka mbështetur çdo protestë. Sigurisht që ka thirrur disa nga protestat më të mëdha në vend, por gjithçka është në të mirë të qytetarëve…. Unë do ta shpall vetë agjendën e protestave, atëherë kur do ta shpall.
Nëse edhe ju mendoni që duhet reaguar, u bëni thirrje qytetarëve që të dalin. Opozita ka për detyrë të mbështesë protesta, por edhe të japë alternativën, rrugën e duhur. Opozita shqiptare në këto 4 vite ka organizuar protestat më të mëdha që ka parë vendi..”.
