Dosja “Habilaj-Tahiri” duket se po bëhet shqetësuese gjithnjë e më shumë për kryeministrin Edi Rama, aq më tepër kur ish-ministri i Brendshëm po flet me shprehjen e dikurshme të kreut të qeverisë: Nuk keni parë asgjë akoma. Ndërkaq shtyrja e mbledhjes së Këshillit të Mandateve për ditën e nesërme dhe zgjatja e këtij procesi që nuk po hap rrugë Prokurorisë për të bërë të mundur arrestimin e ish-ministrit të Brendshëm, Saimir Tahiri duket se nuk është pritur mirë as nga faktori ndërkombëtar në vend.
Kreu i Departamentit për Politikën e Jashtme në Partinë Demokratike, Kreshnik Çollaku thekson se kryeministri Edi Rama ka marrë një mesazh gati kërcënues nga një ambasadë me mjaft peshë në vendin tonë e cila i bën të ditur kryeministrit që të mos pengojë drejtësinë të bëjë punën e saj ndryshe gishti do të drejtohet tek ai personalisht.
Mesazh i orëve të vona e një ambasade të rëndësishme drejtuar Kryeministrit :
“Ne besojmë se kryeministri do ta mbajë premtimin që na ka dhënë prej kohësh dhe nuk do ta pengojë drejtësinë, në të kundërt ai do të gjendet përpara të papriturave të pakëndshme”, shkruan Çollaku në Facebook.
Duhet të kemi parasysh se faktori ndërkombëtar në vend, veçanërisht ambasadori i Shteteve të Bashkuara të Amerikës, Donald Lu nuk është shprehur mbi rastin e ish-ministrit të Brendshëm dhe dyshimet mbi përfshirjet e këtij të fundit në trafikun e drogës.
