Partia Demokratike ka vendosur që të ndryshojë statutin e saj dhe mënyrën se si drejtohet dhe menaxhohet. Me gjithë së jemi në fazat e një projekt-statuti të ri në media është publikuar ajo që është propozuar dhe hartuar nga anëtarët e Këshillit Kombëtar.
Ndryshimet në statutit nuk shihen aq pozitive nga kundërshtarët e Bashës brenda PD-së. Ata nën zë pa bërë akoma deklarata publike deklarojnë se të gjitha ndryshimet në statut janë bërë që Basha të kontrollojë partinë dhe t’i ketë të gjithë nën kontroll për veprimet që kërkon të marrë në parti.
Pjesë të statutit të ri janë publikuar nga “Top Channel”. Statuti ka futur disa risi në mënyrën e drejtimit dhe menaxhimit të kësaj partie. Për shembull, projekt-statuti e ndan partinë sipas parimit të kontrollit dhe balancës së pushtetit, me pushtetin legjislativ (Kuvendin Kombëtar dhe Këshillin Kombëtar), ekzekutivin e partisë (kryesinë) dhe me organet e pavarura: Gjykatën, Komisionin e anëtarësisë dhe zgjedhjeve, si dhe Bordin financiar.
Organizimi i partisë në këtë mënyrë parashikon edhe një ulje të ndjeshme të numrit të anëtarëve të Këshillit Kombëtar, nga 260 në 120. Kurse Kryesia, nga 40 propozohet të bëhet me 25 anëtarë.
Më pak anëtarë mendohet t’i bëjnë këto organe më efikase. Gjykata e partisë është parashikuar të jetë aty për t’i dhënë kujtdo mundësinë për të ankimuar vendimet e partisë.
Një procedurë e posaçme mendohet të ndiqet për kandidaturat për deputet. Sigurisht, procedura e propozuar në këtë projekt-statut të ri nuk mban parasysh një rast urgjence, si ai i krizës politike të pranverës, që u zgjidh me marrëveshjen e 18 majit dhe ku u duk se demokratët nuk kishin shumë kohë për të përgatirur listat.
Projekt-statuti i ri do t’i dorëzohet kryetarit Basha dhe Këshillit Kombëtar këtë javë. E vetmja mënyrë institucionale për ta marrë në shqyrtim projekt-statutit, është Kuvendi.
Kuvendi Kombëtar i Partisë demokratike duhet të mblidhet pas gati një viti. Deri atëherë, projekt-statuti pritet të jetë testi i kryetarit Basha në objektivin e shpallur prej tij, për të bashkuar partinë.
