Ndërsa burime jo zyrtare nga PD kanë njoftuar se në qytetin e Shkodrës mund të ketë përplasje në lidhje me vendimin që do të merret për ish-deputetin Bardh Spahia, kryeministri Rama mbetet i vendosur në rrugën e tij.
Sikundër është bërë e udhës, Rama ka postuar një video, ku na tregon arritjen e radhës të qeverisë që ai drejton. “MIRËMËNGJES, dhe me këto pamje nga spitali më i ri në Elbasan, ju uroj një ditë të mbarë”, shkruan ai bashkëngjitur videos në fjalë.
Spahia u arrestua mbrëmjen e 20 qershorit, pasi u akuzua se kishte marrë pjesë në trazirat që ndodhën para KZAZ, të ngritur në shkollën “Shejnaze Juka” ku u dogjën materialet zgjedhore.
Edhe mbrëmë pas mbylljes së protestës së opozitës para Kryeministrisë, qytetarët e ardhur nga Shkodra me në krye kryebashkiaken Voltana Ademi, e zhvendosën protestën e tyre para Drejtorisë së Policisë, ku kërkuan lirimin e ish-deputetit të këtij qyteti, Bardh Spahia.
