PD jo vetëm që ka ndryshuar strategjinë e protestave, po edhe i ka ‘djegur’ planin Gramoz Ruçit. Duket se loja kukafshehti mes palëve, me Edi Ramën që shmang çdo përballje, dhe opozitën me një grup të gatshëm për protestë brenda pak orësh do të vijojë. Nga ajo çfarë ka ndodhur dje dhe zhvilimet që kemi lënë pas, situata politike është e nderë.
Me gjasë, do duhet kohë që situata ti rikthehet normalitetit me opozitën që tashmë është pa mandat, dhe mazhorancën që voton e vetme çdo ligj që kërkon shumicë të thjeshtë. Tashmë është e sigurtë se protesta e radhës përpara Parlamentit do të jetë në varësi të seancës plenare, dhe se mbetet e pandryshueshme protesta e 16 Marsit, e cila do të mbahet përpara Kryeministrisë.
Anulimi i seancës për këtë të enjte u vendos dje në Konferencën e Kryetarëve me vendim të mazhorancës, ndërsa e njëjta strategji u përdor edhe javën e shkuar, kur në faqen online të Parlamentit, shfaqej rendi i ditës, por jo ora. Disa orë më vonë, kryetari Ruçi e anuloi me pretendimin se ishte informuar për dhunë, informacion që rezultoi një alarm fals, pasi protesta nisi dhe përfundoi në mënyrë paqësore.
