Ish ministri i Financave, Arben Ahmetaj i ftuar në rubrikën ‘Kjo Javë’ tha se Kongresi ishte i fokusuar tek axhenda e PS-së për zgjedhjet lokale.
Duke komentuar dhe aktualitetin politik, Ahmetaj u shpreh se vendimin i opozitës cënon procesin e integrimit të Shqipërisë në BE.
“Ishte një kongres i mirëfilltë pune dhe u fokusuam tek axhenda për qytetarët dhe në platformën ‘Shqipëria që Duam’.
Unë sot kam ngritur një pyetje përse sa herë që Shqipëria është në proces integrimi ata e cilësojnë Shqipërinë në krizë. Ata janë kundër procesit të integrimit në BE. Tani nuk shkojmë ne në zgjedhje me Edi Ramën. Hajde se po e lëmë edhe ne mandatin sepse nuk e dua Gazmend Bardhin sekretar të PD-së, nuk e dua Lul Bashën kryetar të PD-së dhe hajde se po lëmë mandatet”, deklaroi Ahmetaj.
Ish-ministri i Financave foli edhe për përpjekjet e kryeministri Edi Rama, për të lartësuar imazhin e vendit pas zhvillimeve dhe pasojave të krijuar nga ngërçi i qëllimshëm i opozitës, si dhe komentoi protestën e blegtorëve të Lushnjës për TVSH-në e aplikuar mbi qumështin.
“Do të jetë një hap i madh për shqiptarët, por ta pengosh këtë nuk është thjesht një mëkat. Ne meritojmë të jemi pjesë e BE-së. Unë e kam parë kryeministrin që ka bërë të njëjtën gjë, e kam parë në aksion duke punuar për pastrimin e imazhit të Shqipërisë dhe të ekonomisë. Duke pasqyruar shqipërinë e bukur, të pastër ashtu siç është në fakt. Kryeministri është duke bërë detyrën dhe për mua e ka bërë dhe po e bën më mirë nga të gjithë kryeministrat, të paktën për atë që kam njohur unë nga afër ose nga larg”, tha Ahmetaj.
