Sekretari i Përgjithshëm i Partisë Demokratike, Gazment Bardhi i kundërpërgjigjet deklaratës së ministrit të Brendshëm, Sandër Lleshaj, teksa ky u fundit u shpreh se PD përdori në mënyrë abuzive fëmijët dhe gratë në protestën e kësaj të diele.
Sipas Bardhit, Lleshaj nuk e kupton protestën e burrave, grave e fëmijëve për shtëpinë e tyre, pasi “vetë jeton në dy shtëpi të padeklaruara”.
“Sander Lleshaj nuk mund ta kuptojë qendresën e burrave, grave dhe fëmijëve në mbrojtje të shtëpive të tyre nga fadroma e korrupsionit të shefit të tij Edi Rama, sepse Sandër Lleshaj nuk ka derdhur ndonjëherë djersë për shtëpinë e tij.
Ai jeton në dy shtëpi të padeklaruara. Për njërën ka marrë kredi të butë nga qeveria që në 2009 dhe, në mënyrë të paligjshme, nuk e ka përdorur deri në vitin 2018, sa janë të dhënat zyrtare.
Shtëpia tjetër ku Sandër Lleshaj jeton është në Lalz, por ajo nuk figuron askund. Të gjithë e dinë që ministri katil, që nxjerr policinë kundër grave dhe fëmijëve, por nuk lufton krimin, jeton sa pranë qendrës së Tiranës, aq në Gjirin e Lalzit, në shtëpi të padeklaruara”, shkruan sekretari i PD-së.
