PD është ‘surprizuar’ nga deklarata e presidentit Meta, i cili tha se nxorri dekretin për anulimin e zgjedhjeve, pasi kishte informacione se persona pranë kësaj force do të digjnin godinën e Parlamentit. “Një ditë para se presidenti të bënte paralajmërimin e tij për anulimin e datës 30 qershor, kam marrë një informacion sekret dhe të klasifikuar i cili bënte të qartë që persona të caktuar do shfrytëzonin mitingun e opozitës për djegien e Kuvendit të Shqipërisë”, deklaroi Meta.
Dosja.al ka kontaktuar disa nga zyrtarët më të rëndësishëm të kampit blu, të cilët janë shprehur jozyrtarisht se PD nuk ka patur ndonjëherë dijeni për një plan për djegien e Kuvendit. Ata kanë thënë se janë habitur nga deklarata e kreut të shtetit.
“Nuk kemi dëgjuar asnjëherë për një plan të tillë. Jemi të habitur nga deklarata e kreut të shtetit”, u shpreh një burim tejet i afërt me kryetarin Lulzim Basha për Dosja.al.
Mbetet ende e paqartë deklarata e kreut të shtetit, por edhe informacionet të cilat nuk u bënë publike para 30 qershorit.
Meta ka dhënë llogari sot për mbi 2 orë në Komisionin Hetimor në Kryesinë e Kuvendit. Meta arsyetoi se i anuloi zgjedhjet, pasi kishte informacione se Kuvendi do të digjej më 8 qershor.
I pyetur nga deputetja e Partisë Socialiste, Klotilda Bushka, nëse u konsultua me partnerët politikë para se të anulonte zgjedhjet të 30 qershorit, Meta ka vënë theksin tek kokëfortësia e liderëve kryesorë.
“Kush tha se zgjedhjet lokale nuk mund të zhvilloheshin brenda muajit korrik, nëse do të kishte vullnet politik? Ky ka qenë vullneti im që zgjedhjet të zhvilloheshin sa më shpejtë. Kokëfortësia e kryeministrit për të mos shtyrë 30 qershorin dhe e dyta, kokëfortësia e kryetarit të PD për të mos u ulur në tryezë me Ramën kryeministër”, tha Meta në Komisionin Hetimor.
