Kryeministri Edi Rama ka reaguar pas Kuvendit të Berishës, duke ndarë me ndjekësit në rrjetet sociale një thënie të filozofit dhe eseistit rumun Emil Cioran, teksa bën ironi me situatën politike në PD.
PD-ja festoi ditëlindjen e 31-të e ndarë në dy kampe. Kryeministri Edi Rama ka përcjellë një mesazh të koduar në rrjetet sociale. Në këtë thënie flitet për një person në majat e dëshpërimit që kapet pas pasionit të absurdit, si e vetmja forcë që mund të hedhë dritë mbi terrin e kaosit.
Ky qëndrim vjen në një kohë kur Sali Berisha votoi shkarkimin e Lulzim Bashës nga kryetar i PD-së. Ish-kryeministri Sali Berisha ka hedhur votën ku shtrohej pyetja: A jeni dakord me shkarkimin e Lulzim Bashës?
Përgjatë tre muajve të “Foltores”, Berisha ka hedhur akuza të rënda ndaj Lulzim Bashës. “Peng kryetari” apo “kryetari i vulës”, ishin disa nga etiketimet e shpeshta që Berisha i bënte Bashës.
Mesazhi i Ramës
THËNIE E DITËS
Në majat e dëshpërimit, pasioni i absurdit është e vetmja forcë që mund të hedhë një dritë djallëzore mbi terrin e kaosit. Kur të gjitha arsyet – morale, estetike, fetare, sociale e me radhë – pushojnë së udhëhequri jetën e dikujt, si mundet ai të jetojë pa iu dorëzuar hiçasgjësë? Vetëm duke u kapur pas absurdit, pas dashurisë për padobishmërinë absolute, duke dashuruar diçka që s’ka asnjë thelb por që simulon iluzionin e jetës. I bie të jetosh vetëm e vetëm sepse malet nuk qeshin dhe krimbat nuk këndojnë.
Emil Cioran
