24 orë para afatit ligjor Partia Demokratike ka dorëzuar në KQZ kërkesën për t’u regjistruar si subjekt për zgjedhjet e 25 qershorit.
Kërkesa përfshin edhe pjesëmarrjen e Partisë Demokratike në zgjedhjet e pjesëshme në Kavajë që do të zhvillohen në të njëtën ditë me ato parlamentare.
Ky hap procedurial vjen pas paktit Rama-Basha ku opozitës iu dhanë gjashtë poste ministrore dhe ai i zv.kryeministrit.
Sakaq, PD është drejt përpilimit përfundimtarë të listave të kandidatëve, ku kuriozitetin më të madh e përbën niveli i përfshirjes dhe vendkandidimet e aleatëve që kanë vendosur të garojnë nën siglën e PD-së.
Sipas burimeve mediatike të deritanishme, krerët e partive kryesore aleate do të pozicionohen si fitues në listat e kandidatëve për deputetë.
Mediu i PR-së, Shehi i LZHK-së, Ndoka i PDK-së,dhe Dule i PBDNJ-së duket se e kanë marrë tashmë këtë siguri nga PD.
Pozicioni i PAA-së dhe Agron Dukës, mbetet ende i paqartë pasi vet ai ka hedhur idenë e daljes i vetëm në zgjedhje, duke pretenduar se fiton të paktën dy deputetë.
Ndërsa fati i Eduard Ndocajt e Kreshnik Spahiut, aleatëve më të rinjë në kohë të PD-së, ende nuk dihet./Tirana Today/
