Rritja e çmimit të ujit nga Bashkia e Tiranës është cilësuar nga Partia Demokratike si një aferë korruptive. PD ka akuzuar PS dhe LSI se bashkimi i votave të tyre për të marrë këtë vendim ka kushtuar 240 milionë euro. Anëtari i Këshillit Bashkiak të Tiranës, Akil Kraja, ka dhënë një deklaratë për mediat.
“180 milionë euro për UKT-në dhe 60 milionë të tjerë për koncesionin e shkollave të Tiranës. Qindra milion euro të qytetarëve të Tiranës për interesat okulte të Erion Velisë. Por çfarë ndodhi konkretisht. Në mungesë totale transparence, të martën në mbrëmje, këshilltarët bashkiakë të PS dhe të LSI organizuan një takim të përbashkët pa pjesëmarrjen e shoqërisë civile e as më pak të këshilltarëve demokratë mbi çështjen e ngritjes së tarifës së ujit”– tha ai.
Ai ka thënë se edhe pas këtij takimi, këshilltarët e Partisë Demokratike kanë bërë disa thirrje publike drejtuar këshilltarëve, e në veçanti atyre të LSI-së, të mos legjitimojnë këtë aferë okulte të Veliajt.
“Thirrja jonë ishte fare e thjeshtë : 19 votat tona me 13 votat e LSI përbënin shumicën e vendimmarrjes së këshillit (32 nga 61 këshilltarë në total). Ne mund të bllokonim Erion Velinë por pazari 240 milionë eurosh rezultoi të ishte më i fortë. Të mërkurën, në orën 18:00, pavarësisht thirrjes sonë, LSI luajti me dy porta. Veliajt ju dha vota, popullit ju dha fatura”- sqaroi Kraja.
Ai shpjegoi se kanë qenë dy këshilltarë të LSI, Genta Mezini dhe Agim Kraja ata që siguruan kuorumin e nevojshëm duke ju shtuar 25 votave të PS, 3 të PDIU dhe 1 vote të FRPD.
“Ndërkohë, ende pa filluar mbledhja e Këshillit, nga salla kishin dalë të gjithë këshilltarët demokratë si dhe shumica e këshilltarëve të LSI. E ripërsëris, të 19 këshilltarët demokratë kanë bojkotuar që në fillim seancën e djeshme duke mos marrë pjesë në asnjë votim apo diskutim, përfshirë rendin e ditës apo votimin e kredive të buta siç u shpif së fundmi. Dje vota e bashkimit PS/LSI vlente 240 milion euro. Kaq duhet mbajtur mend”– tha Akil Kraja.
