Ferhat Hoxhaj është shqiptari nga Prizreni, i cili jeton prej 8 vitesh në Prijepolje të Serbisë.
34-vjeçari është pronar i katër furrave të bukës dhe ka ndërmarrë një nismë që është vërtetë për t’u duartrokitur.
Së fundmi, në secilën furrë të bukës, ai ka vendosur një njoftim, sipas të cilit çdo njeri në nevojë mund të marrë një ose dy bukë falas.
“Ky është vetëm një gjest human, për t’ju mundësuar bukën njerëzve që jetojnë në kushte të vështira dhe nuk mund të paguajnë kafshatën e gojës. Çdo familje në nevojë mund të marrë një ose dy bukë në ditë”, shprehet Ferhati për Tirana Today.
Gjesti i tij ka lënë gojëhapur çdo person që ka parë njoftimin, madje ai është kontaktuar nga disa gazeta serbe, të cilat i kanë kushtuar atij një artikull.
Shqiptari tregon që e ndërmori këtë nismë prej pak ditësh, por lajmi mori “dhenë” menjëherë.
“Shpalljen për ndihmë e kam vënë prej pak ditësh, që më 22 korrik. Të gjithë serbët janë të mahnitur, as nuk e kam pritur se ky veprim mund të shkojë kaq larg si lajm human. I falënderoj të gjitha mediat dhe televizionet dhe mendoj se kudo që shkojmë në botë, duhet ta përfaqësojmë sa më mirë popullin shqiptar me sjelljet tona”, rrëfen Ferhati për Tirana Today.
I pyetur në lidhje me kërkesat e personave në nevojë pas shpalljes së njoftimit, 34-vjeçari thotë:
“Fillimisht ka pak kërkesa, por pres që të rriten, pasi ka disa që ndoshta nuk janë të informuar , ndoshta edhe ndihen në siklet. Por, qëllimi është që ne të gjejmë zgjidhje dhe t’i ndihmojmë sadopak ata që janë në gjendje skamnore”, përfundon shqiptari për redaksinë e Tirana Today duke dhënë një shembull për secilin prej nesh, se sa pak vullnet duhet për t’u dhënë shumë njerëzve./Tirana Today
