Pak më herët, kryeministri Edi Rama reagoi në lidhje me 3-vjetorin e Reformës në Drejtësi. Teksa ka vlerësuar të vetët, Patozi nga ana tjetër ka shprehur merakun se reforma nuk është vënë në zbatim.
Me anë të një komenti në Facebook, ai apelon se në vend të një urimi për reformën, duhet parë rezultati, i cili për të, duket i largët.
Me tone ironike, ai citon më tej se në këto tre vjet, Reforma në Drejtësi ende nuk është kryer, ndaj gotat e shampanjës nuk gjejnë vend në këtë rast.
“NË VEND TË NJË URIMI PER REFORMËN
Reforma në Drejtësi nuk ka nevojë, as ta qash, dhe as të ngresh dolli shqiptarçe për të, duke pasur parasysh gjithmonë “armikun”, që është duke plasur nga marazi për ata që kanë festë.
Mjafton që ajo të fillojë një ditë nga puna, se këto tre vjet kanë qenë vetëm stërvitje për një shërbim, i cili ende nuk është kryer.
Prandaj na i kurseni, po mundët, si mallkimet, ashtu edhe gotat e shampanjës për një ngjarje, që ende nuk ka ndodhur, por është vonuar jashtëzakonisht me kontributin e të gjithëve!
Uroj që vitin e ardhshëm askush të mos kujtohet për 4-vjetorin e 22 korrikut të votës në parlament. Do të ishte prova më e qartë se subjektet e reformës janë duke u marrë me halle më të mëdha se përkujtimoret”.
