Deputeti i Partisë Demokratike, Astrit Patozi vazhdon t’i qëndrojë idesë se mospjesmarrja e opozitës në zgjedhje do të ishte skenari më i keq i mundshëm.
Patozi ka shpjeguar edhe bojkotimin e takimit të zyrtarit të lartë amerikan, Hoyt Brian Yee.
Përmes një postimi në profilin e tij zyrtar në Facebook, Patozi shpjegon se kanë qenë arsye personale ato që e kanë shtyrë që të mos ishte pjesë e takimit midis deputetëve të Partisë Demokratike dhe zyrtarit të lartë amerikan.
“E kam shprehur në mënyrën e duhur falënderimin dhe vlerësimin tim, jo vetëm ndaj ftesës për t’u takuar me zotin Yee, por mbi të gjitha ndaj përpjekjes së tij dhe të administratës amerikane për t’i dhënë një zgjidhje in extremis krizës se pakuptimtë politike në Tiranë. Për një arsye të fortë personale nuk do të jem i pranishëm në takim, por vijoj të inkurajoj çdo faktor politik ndërkombëtar dhe vendas, që mund t’i shërbejë ende kauzës së zgjedhjeve normale në Shqipëri. Se nuk ma nxë goja ta them atë termin “të lira e të ndershme”, që më duket si versioni surrealist i ëndrrës shqiptare për demokraci perëndimore, kaq i largët me katandisjen tonë sot.”
Patozi duket shumë pak optimist kur flet për zgjidhjen e krizës politike, ndërsa shprehet kundër Bashës për mospjesëmarrje në zgjedhje.
“Ndonëse nuk i përkas racës së optimistëve futuristë, të cilët besojnë çdo përrallë që u shfaqet përpara, ende kam një shpresë të vakët se mund të gjendet prapëseprapë një shteg për të evituar dështimin e zgjedhjeve. Sepse i qëndroj fort bindjes sime se mospjesëmarrja e Partisë Demokratike në to është skenari më i keq i kësaj krize të pashembullt dhe të paprecedent”, përfundon shkrimin e tij deputeti demokrat.
Shpjegimi i deputetit Patozi në Facebook:
