Koordinatori i ‘Bindjes Demokratike’ Astrit Patozi, u ka bërë një ftesë të gjithë partive të reja që janë krijuar dhe do të krijohen, që të dalin me një listë të përbashkët në zgjedhjet e 25 prillit. Sipas tij, kjo ështe e vetmja alternativë, për të mundur PS-PD dhe LSI-në. Në një intervistë për ‘Report Tv’, ai tha se ‘Bindja Demokratike’ dhe ai në krye, kërkojnë që vendi të ketë një alternativë të re, dhe forcat që kanë të njëjtën kauzë të maksimalizojnë forcat e tyre që të bashkohen në një listë të përbashkët. Në këtë formë, të kryesojnë para PS-PD dhe LSI-së.
“Ne jemi partia e parë që do garojmë me lista të hapura 100%, kushdo që do kandidojë nën siglën e partisë sonë duhet të respektojë këtë vendim. Por përtej kësaj, ne duam që vendi të ketë një alternativë të re dhe forcat që kanë të njëjtën kauzë të maksimalizojnë forcat e tyre që të bashkohen në një listë të përbashkët, që të jetë më tërheqëse e qytetarëve që të shkojnë përtej atyre tre forcave”, tha ai.
Astrit Patozi ka edhe një përgjigje për kryedemokratin Lulzim Basha, i cili dje hodhi akuza se partitë e reja po krijohen nga kryeministri Edi Rama. Përgjigjen zgjedh që ta jap me një deklaratë të Ilir Metës, në kohën kur ishte në krye të LSI-së.
“Do doja që as ai të mos merrej se çfarë bëjmë ne, dhe ne me të. Basha që duhet të ishte promotor i një fushate agresive qeveritare, po bën fushatë kundër disa partive të reja që ose do krijohen ose janë krijuar, dhe ky është një lajm i keq për PD, dhe Shqipërinë. Se partia kryesore e opozitës është e kapluar nga një mentalitet stalinist. Nëse ka ndërmend që të bëjë fushatë kundër nesh, pushka top iu bëftë ne këtu jemi, por ne nuk do merremi me të. Të krijuar nga Rama partitë e reja? Më kujtohet shprehja e Metës, “Lulzim Basha gënjen dhe për orën”. Ajo është një reklamë falas”, tha ai.
Një ditë më parë, kreu i PD-së, Basha, deklaroi se asnjë nga partitë e reja që po formohen së fundmi, mes të cilëve edhe ajo e ish-kryetares së parlamentit, Jozefina Topalli, nuk kanë dalë nga PD-ja, por janë parti të krijuara nga kryeministri Rama. Ai tha se këto lëvizje tregojnë sesa i pashpresë është kreu i qeverisë.
“Nuk ka asnjë parti të dala nga Partia Demokratike, ka vetëm parti të krijuara nga Edi Rama. Po prapë është i pashpresë. Madje kjo tregon sesa i pashpresë është”, përfundoi Basha.
