Zgjedhjet e 25 prillit do të mbahen në një situatë aspak normale, për shkak të pandemisë së Covid-19.
Megjithatë, Astrit Patozi, koordinatori i Bindjes Demokratike u shpreh në ”A2”, se e vetmja gjë pozitive e pandemisë është që do ta çlirojë fushatën nga patetizmi dhe nga shpenzimi i energjive të tepërta.
Patozi u shpreh se Bindja Demokratike do të publikojë platformën e saj, dhe synon që të jetë forcë përcaktuese në qeveri.
Astrit Patozi: “Ne po punojmë që të kemi një rezultat domethënës në këto zgjedhje. Ne duam që Shqipëria të ndryshojë pas 25 prillit sadopak. Po bëjmë përpjekjet tona që të kemi përfaqësues sa më dinjitoz, pasi të dyja kampet nuk ofrojnë asgjë të re. Janë të njëjtët njerëz si në zgjedhjet e fundit. E vetmja gjë e re jemi ne partitë e reja. Bindja Demokratike do ta bëjë diferencën nëpërmjet idesë dhe njerëzve. Ne duam që Shqipëria të ndryshojë, qofshim apo jo fitues, kjo nuk ka shumë rëndësi. Bindja synon të jetë forcë përcaktuese qeverisjeje. Ne kemi mundësi të detyrojmë këta bajlozët e njohur të politikës të futen në kushte të reja dhe rregulla të reja pas zgjedhjeve.”
