Astrit Patozi, koordinatori i partisë së re Bindja Demokratike, në emisionin ‘Top Talk’, teksa bëri një analizë të domethënies të emrit të kësaj force, nuk nguroi të theksojë se bindja demokratike që ekziston te vendet e Evropës Perëndimore, i nevojitet edhe shoqërisë sonë.
“Ne mendojmë se Shqipëria ka këtë periudhë problematike, për shkak të një bindjeje demokratike që nuk është problem i shoqërisë, por i politikave të gabuara. Bindja demokratike që ekziston te vendet e Evropës Perëndimore, i nevojitet edhe shoqërisë sonë.
Kjo është domethënia në vija të trasha dhe qëllimi ynë”, deklaroi Patozi.
Po kështu ai është i mendimit se vendi ynë ka nevojë për një projekt që të godasë sistemin. “Shqipëria ka nevojë për një projekt të ri politik që duhet të godasë sistemin”, dhe theksoi se “ky projekt është ëndrra e një grupi shumë të madh njerëzish”.
Ai iu përgjigj deklaratës së Lulzim Bashës, i cili sot, kur u pyet mbi partinë e re Bindja Demokratike, deklaroi se “nuk do ketë më qeveri false, parlament fals, apo opozitë false”. Duke qëndruar në të njëjtën linjë, Patozi, duke iu referuar deputetëve që dogjën mandatet, tha se ata janë të lirë të bëjnë zgjedhjen e tyre, dhe se ai është i lirë që të bëjë diferencën me qeverinë dhe jo vetëm.
“Askush nuk e ka monopolin e opozitës. Pozicioni i çdo qytetari varet nga raporti që ka me qeverinë. Unë nuk kam pasur asnjë sekond të jetës sime që nuk kam qenë përballë Partisë Socialiste. Ata janë të lirë të djegin mandatin, ndërsa unë jam i lirë të bëj diferencën me qeverinë dhe me ata që mendojnë se duke vrarë veten, do të rrëzojnë qeverinë”, theksoi Patozi.
“Ky është projekti që shqiptarët duan sot”, nënvizoi ai.
