Duke filluar nga java e ardhshme, asnjë institucion shtetëror, për nevojat e procedurave të veta, nuk do t’ua kërkojë më qytetarëve konfirmimin për gjendjen aktive të mjetit, por do të jenë vetë institucionet që do ta bëjnë këtë verifikim përmes portalit online e-Albania.
Njoftimin e ka dhënë Ministria e Infrastrukturës dhe Energjisë, e cila sqaron se autorizimi për rifitimin e lejes së drejtimit dhe vërtetimi për lejen e drejtimit, të cilat janë shërbime me pagesë, do të kryhen nga qytetari online portalit e-Albania.
Kështu, çdo qytetar që ka nevojë për këto dokumente mund ta bëjë pagesën online dhe gjithashtu merr vërtetimin online.
Ministria e Infrastrukturës dhe Energjisë synon lehtësimin e procedurave dhe shërbimeve të tjera që kanë të bëjnë me Drejtorinë e Përgjithshme të Shërbimeve të Transportit Rrugor, me objektiv eliminimin e çdo mundësie për abuzim ndaj qytetarëve.
