Nga Anxhela Ferra
Lajmi i dhënies me qira të kabinave në Syrin e Kaltër për një shumë prej 600 eurosh solli një reagim të gjerë te njerëzit. Të cilët e quajtën absurde shumën e përcaktuar nga Ministria e Financave për një pasuri kombëtare.
Por, në një prononcim mediatik, ministri i Mjedisit Blendi Klosi e quajti një anomali të institucioneve dhe procedurat u pezulluan. Mirëpo, çfarë do të ndodhë me Syrin e Kaltër?
Aktivisti Arben Kola në një intervistë për Tirana Today thotë se anulimi i dhënies me qira është një mashtrim. Dhe i bën thirrje njerëzve që të ndërgjegjësohen më tepër, para se të shterojnë gjithë pasuritë kombëtare të vendit tonë.
“Nuk kemi pasuri për të dhënë me qira. Sepse ato janë pasuri të përbashkëta, kombëtare. Deklarata e parë qëndron, ajo zonë do të jepet me qira. Këto të tjerat janë mashtrime. Dhe ne këtë e kemi parë me Valbonën, me Holtën. Por, edhe me shumë projekte të tjera, ku këta kanë deklaruar anulim dhe në krahun tjetër kanë vazhduar masakrimin e parqeve kombëtare dhe lumenjve.
Nuk ka ndodhur në asnjë nga vendet e rajonit apo Europë dhe as nuk do të ndodhë asnjëherë. Në rast se do ta marr në menaxhim privati, me siguri që do të kishte shumë abuzim. Në shumë mënyra, mund të grabiste dhe ujin për ta paketuar dhe shitur. Mund të rriten tarifat e mund të arrihet edhe në dhunimin e njerëzve të caktuar. Të cilët kanë guxim të protestojnë për një padrejtësi. Ndaj parqet kombëtare janë e drejtë ekskluzive dhe duhet të jenë e shtetit shqiptar.
Nëse shteti nuk është i aftë për t’i menaxhuar, bashkë me agjencinë e zonave të mbrojtura; le të japin dorëheqjen dhe të thyejnë qafën.”
Dhënia me qira e pasurive natyrore nuk është diçka e padëgjuar në vendimmarrjet e qeverisë. Parku i Drilonit është duke u diskutuar po ashtu për tu dhënë një shoqërie private me qira. Sipas Kolas kjo është diçka që duhet ndaluar.
“Unë mendoj se njerëzit i revoltoi çmimi i ulët, kurse mua më irriton dhënia me qira. Nuk duhet të jepet fare me qira. Ajo duhet të rri në menaxhimin e shtetit. As Syri i Kaltër, as Driloni, as Butrinti nuk janë për qira. Çfarë kanë ngelur burimet e fundit, duan t’ia japin shokëve, dashnoreve, etj. Që këta i dinë shumë mirë se kush janë. Arsyeja përse po shtohen këto raste për të dhënë këto pasuri natyrore me qira vjen si rezultat i mos-funksionimit të shtetit. Sepse realisht nuk kemi asnjë lloj gjykate që të na mbrojë ne si shqiptarë.”
Në intervistën për Tirana Today aktivisti shprehet me nota të ashpra përkundrejt qeverisë dhe ministrit të mjedisit Blendi Klosi.
Me fjalën që deklaroi ministri “anomali” tregoi që është i pirë gjithë kohën. Do të thotë që nuk është në kontroll të punës për të cilin shqiptarët e paguajnë. Nuk kemi çfarë t’iu tregojmë brezave që do të vijnë, në rast se ne nuk do të arrijmë të ndalojmë këta dhunues të brendshëm. Këta pushtues të brendshëm, këta gjak prishur, të pangopur, fëmijë të djallit. Këtë klasë politike, unë nuk mund t’i quaj shqiptarë, këta janë pjellë e djallit.”
Për këto arsye, si edhe për ruajtjen e liqeneve, dhjetëra qytetarë u mblodhën sot si shenjë revoltë. Me moton ‘Peshkaqenët’ po gëlltisin lumenjtë dhe ‘Elefantët’ po hanë male, aktivistët marshuan drejt Ministrisë së Mjedisit. Për t’i kërkuar Blendi Klosit që t’i japë fund këtyre projekteve. Ose në të kundër sipas tyre duhet të japë dorëheqjen./ TIRANA TODAY
