Çështja e ish-deputetit Alfred Peza do të gjykohet nga Gjykata e Krimeve të Rënda. Kjo pasi Gjykata e Lartë ka shpallur moskompetencën për gjykimin e Pezës, pasi ky i fundit nuk është më deputet dhe s’ka mandat, ndaj nuk është subjekt i posaçëm.
Peza po hetohet për të paktën tre vepra penale, si “Fshehje e të ardhurave”, “Pastrimi i produkteve të veprës penale” dhe “Refuzimi për deklarim, mosdeklarim, fshehja ose deklarimi i rremë i pasurive”.
Më 18 prill, Gjykata për Krime të Rënda vendosi sekuestro preventive ndaj aksioneve të një banke të nivelit të dytë në vend, që i përkisnin bashkëshortes së deputetit Peza.
Vendimi erdhi si pasojë e hetimeve që nisën ndaj deputetit socialist dhe bashkëshortes së tij Mirela Ndini, pas publikimit në media se në mars të vitit 2015 zonja Ndini kishte blerës 1 përqind të aksioneve të bankës me një vlerë prej 113 milion lekë.
Peza sqaroi se pasuria prej 113 milion lekësh me të cilat bleu aksionet në një bankë private, është vënë nga kursimet.
Por sipas prokurorisë, është konstatuar se të ardhurat neto familjare të bashkëshortëve Peza-Ndini ndër vite, duke zbritur shpenzimet, është rreth 51 milionë lekë të reja, ndërkohë që vlera e aseteve në pronësi të tyre (pasuri të paluajtshme dhe të luajtshme, përfshirë llogaritë bankare) është në vlerën e rreth 135 milionë lekëve të reja.
