Të shkarkohesh nga puna, jo gjithnjë është një lajm i keq, shembulli tipik për këtë është Jose Mourinho. Shkarkimi i Jose Mourinhos i ka kushtuar Manchester United 19.6 milionë stërlina, ka njoftuar klubi anglez. Ish-trajneri i “Old Trafford” u largua në dhjetor, pasi humbi 3-1 ndaj Liverpol-it, ndërsa shifrat financiare kanë zbuluar se ai dhe stafi i tij do të kompensohen me afërsisht 20 milionë stërlina për prishjen e njëanshme të kontratës.
Portugezi ka fituar 22,3 milionë euro, shumë më shumë se sa do të përfitonte nëse do të qëndronte në krye të “djajve të kuq” deri në 2020, vit ku i skadonte kontrata. Kujtojmë që Mourinho përfitonte 17 milion euro në sezon. Për Mou kjo nuk është diçka e re pasi edhe kur u shkarkua nga Chelsea në vitin 2007 përfitoi 21,3 milionë sterlina. Blutë nuk nxorën mësim nga ky shkarkim pasi dhe në 2015 u detyruan ti paguanin portugezit afro 8,3 milionë sterlina për të hequr “qafe” specialin.
Në total nga Chelsea, Mourinho përfitoi afro 35,6 milion euro kompensim. Nëse mbledhin të gjithë shkarkimet e tij, portugezi ka përfituar afro 60 milion euro, një pasuri marramendëse, e të mendosh që e ka fituar duke u shkarkuar nga puna.
