Qeveria ka vendosur t’i akordojë dhënien e shtesës së pensionit të posaçëm shtetëror Mjeshtrit të Madh, Jorgo Papingji, në masën e katërfishit të pensionit social.
Poeti i njohur Jorgo Papingji, në krijimtarinë e tij në tekstet e këngëve të ndryshme ka marrë shumë vlerësime. Janë të shumta tekstet që ka shkruar në këngën e lehtë, atë popullore si dhe këngët për fëmijë, duke u vlerësuar me dhjetëra çmime në festivale të ndryshme. Por ai muaj më parë rrëfente në një studio televizive se nuk e merrte pensionin e veçantë.
Në muajin tetor, në një intervistë tek “Vizioni i Pasdites”, Papingji e renditi këtë moment të jetës së tij si një peng, dhe se ende askush nuk i ka shpjeguar se ku shkon pensioni i veçantë që i takon atij prej 8 vitesh që nga marrja e titullit.
Mes emocionesh dhe përulësisë të një artisti të madh ai u shpreh :
“Unë nuk e kam kuptuar asnjëherë pse më ka ngelur peng. Ka lidhje me vlerësimin e punës sime, jo me vlerësimin formal se i kam marrë të gjitha, çmime, vlerësime, letra, fleta nderi, fleta lavdërimi.
Nuk e kam kuptuar asnjëherë, kam tetë vite që kam marrë titullin “Mjeshtër i Madh” dhe gjatë këtyre tetë viteve nuk ka dal ende vendimi që unë të marr pensionin e veçantë.
Unë nuk e di dhe nuk besoj që jepet pas vdekjes. Në një moshë që jam unë, do ta kisha marrë atë pensionin. Nuk e di arsyen, cila është mënyra e vlerësimit, kush e pengon këtë gjë! Dua të them që më jepet apo nuk më jepet pensioni i veçantë, unë pensionin e marrë në çdo takim me njerëzit, në çdo tavolinë që rri me njerëzit. Në çdo rrugë që kaloj, me mijëra përshëndetje nga njerëzit e thjeshtë dhe të natyrshëm edhe nganjëherë ku bie rasti ju them që nuk e kam marrë pensionin, më thonë: “Ti se ke marrë pensionin! Si ka mundësi..”, përfundoi Papingji.
