Kreu i KQZ-së, Klement Zguri, ka reaguar pas skandalit të ditës së sotme, në lidhje me pasaktësitë e numrave të votave që janë deklaruar sot, në krahasim me ato të publikuara më parë nga ky institucion.
Zguri, në një dalje për mediat, deklaron se shifrat e paraqitura nga KQZ-ja nuk janë zyrtare, duke kërkuar kështu që të bëhet një hetim administrativ në lidhje me këtë çështje.
Deklarata e plotë e Zgurit:
“Tabelat përmbledhëse duhet të përmbajnë numrin e saktë në votim, si dhe numrin e votave për çdo kandidat. Si rregull këto shifra duhet të korrespondojnë. Nëse shifrat janë kontradiktore, ky mund të jetë tregues paaftësie, por edhe tregues parregullsie. Se ç’ka ndodhur në rastin konkret kjo do të zbulohet nga hetimi.
KQZ ka dy mundësi për verifikim, zbulon dhe korrigjon gabimet, shqyrtimi i ankimimeve zgjedhore kundër rezultatit. Për këtë, duhet që subjektet zgjedhore të depozitojnë ankime. Kërkohet bashkëpunimi i subjekteve zgjedhore, që vënë në lëvizje KQZ. Ka rëndësi vënia në lëvizje e procedurës, nëse duam të kuptojmë të vërtetën e këtyre shifrave.
Saktësia e tyre është vendimtare për cilësinë e procesit të 30 qershorit, ndaj KQZ duhet t’i trajtojë me seriozitet. Kolegët e KQZ duhet të bëjnë gjithçka për të sjellë qartësi të plotë”, tha Zguri.
