Pas shtatë javësh i infektuar me koronavirus, më në fund sulmuesi argjentinas, Paulo Dybala është shëruar.
Lajmi u bë i ditur nga klubi i Juventusit, përmes një komunikate zyrtare.
“Paulo Dybala ka kryer testin e dyfishtë sipas protokollit me testet diagnostikuese (tamponë) për koronavirus-Covid-19: përgjigja ka qenë negative. Ndaj lojtari është i shëruar dhe nuk do t’i nënshtrohet më regjimit të autoizolimit në shtëpi”, shkruhet në komunikatë.
Njëkohësisht me klubin, edhe vetë Dibala ka shprehur gëzimin e tij me një mesazh në instagram: “Fytyra ime tregon gjithçka: më në fund i shëruar nga Covid-19”.
Lojtari i Juventusit ishte konfirmuar pozitiv me koronavirus që më datë 21 mars. Ai bëri testin e katërt një javë më parë dhe rezultoi sërish pozitiv.
Dybala ishte një nga të parët futbollistë të kampionatit italian të prekur nga Covid-19, menjëherë pas shokëve të skuadrës, Daniele Rugani dhe Blaise Matuidi.
Ndërkohë nuk dihet ende nëse edhe e dashura e tij, Oriana Sabatini është shëruar apo jo, pasi edhe ajo ka rezultuar pozitive.
