Berisha nuk do të heq dorë nga Partia Demokratike, ndonëse u shpall “non grata” edhe nga Britania e Madhe. Në fjalën e tij, ai nënvizoi se po lufton për dinjitetin e shqiptarëve, për të vërtetën dhe liritë e tyre. Kryetari i PD-së, Sali Berisha ka konfirmuar se i ka ardhur një letër nga Sekretari i Brendshëm, i cili ka marrë vendim për moslejimin e hyrjes së tij në Mbretërinë e Bashkuar. Gjatë një konference për shtyp, Berisha u shpreh se ky vendim vjen në vazhdën e shpifjeve të disa personave. Berisha u shpreh se vendimi i Mbretërisë së Bashkuar është i lidhur me dy arsyetime, lidhjet me grupe të krimit të organizuar dhe kriminelë, dhe korrupsion për pasurim. Ai sqaroi se vendimi është në vazhdën e shpifjeve nga një grup personash.
“Unë po nderoj demokratët dhe vendin se po luftoj për dinjitetin e shqiptarëve. Për të vërtetën dhe liritë e tyre. Unë jam i bindur se ata do kenë të gjitha shanset me votë, të dëshmojnë mendimet dhe ndjesitë e tyre ndaj këtij vendimi.
Kam bindjen e plotë se po mbroj sot, dhe koha po e tregon, sepse ata njerëz që ndjekin Sali Berishën, nuk e ndjekin për sytë e bukur, por për idealet që ai mbron. Të themi të vërtetën.
Ata janë bashkëidealistë që po shtohen përditë. Derisa e detyruan Edi Ramën të bëjë antimiting. Çdo gjë e bëj për qytetarët shqiptarë. Jam i inkurajuar për një mbështetje në rritje nga ana e tyre”, tha Berisha.
