Një tjetër zyrtare shqiptare ka rezultuar pozitive me COVID-19. Bëhet fjalë për drejtoreshën e Operatorit të Shërbimit Shëndetësor, Mirela Cami. Ministria e Shëndetësisë bën me dije se është kryer e njëjta procedurë si për çdo qytetar edhe për znj. Cami, e cila është tashmë e vetë-izoluar në shtëpi, e ndërsa vijon të punojë nga banesa e saj. Gjendja e saj është e stabilizuar.
Pak ditë më parë, kreu i Urgjencës Kombëtare Skënder Brataj u prek nga koronavirusi. Ai u izolua në shtëpi, pasi nuk ka komplikacione me shëndetin.
Deri tani në Shqipëri janë shënuar 10 viktima. Vlen për tu theksuar fakti se për të dytën ditë me radhë është ulur numri i të prekurve të rinj nga koronavirusi në vend, duke dhënë shpresë se rritja e kurbës ka filluar të ngadalësohet. Gjatë 24 orëvë të fundit janë konstatuar 11 raste të reja, duke e çuar numrin total të të prekurve në 197.
