Pas dy satelitëve, Shqipëria do të marrë edhe dronë të armatosur. Kjo është konfirmuar sot nga kreu i qeverisë, Edi Rama. Në ambientet e Kryeministrisë po prezantohet shërbimi satelitor i Republikës e Shqipërisë, në kuadër të mbikqyrjes së territorit të gjithë vendit. Kryeministri Rama tha se tashmë do të kemi një kryeinspektoriat në qiell. Falë satelitëve në hapësirë do t’i japë përgjigje një debati shumë të madh që po bëhet kohët e fundit për ndërtimet pa leje në Tiranë. Sa i përket dronëve, Rama pohoi se janë për rast ekstrem kundër terrorizmit apo një armiku potencial.
“Me lëshimin e këtyre satelitëve hyjmë në një epokë tjetër në funksion të forcimit të shtetit dhe të barazisë përpara ligjit, por dhe në funksion të të drejtës së barabartë për të përfituar nga gjithë mbështetja shtetërore.
Satelitët shumë shpejt do pasohen nga dronët. Dronët të cilët me zhvillimet e reja ne e kemi vendosur t’i kompletojmë dhe t’i marrim dronë të armatosur. Natyrisht dronët e armatosur janë për rast ekstrem kundër terrorizmit apo një armiku potencial, por dronët kanë një tërësi funksionesh në komplementaritet në përputhje me satelitët duke qenë në dinamikë të vazhdueshme dhe duke bërë rakordime apo thellime të të dhënave.
Edhe dronët do të jenë në dispozicion. Proceset janë të tilla që jo gjithmonë arrin t’i mbyllësh atëherë kur i parashikon sepse kanë burokraci. Këtë e kam për ata që filluan të përqeshin kur u kalua një afat i parashikuar për lëshimin e satelitëve.
Sot jemi këtu me një rezultat pozitiv që na jep mundësinë të shikojmë të lehtësuar qysh prej vitit që vjen pozicionin tonë në luftën për kontrollin e plotë mbi territorin dhe në funksion të rritjes së kapaciteteve shtetërore në të ardhmen në të gjithë sektorët horizontalisht. Shqipëria dhe shteti shqiptar janë më të fortë në këto instrumente”, u shpreh Rama.
