Kryeministri i Kosovës, Ramush Haradinaj ka zhvilluar sot një takim me aleatët e Partisë Demokratike, Fatmir Mediun, Agron Dukën, Nard Ndokën dhe Vangjel Dulen.
Përmes një postimi në “Facebook”, Haradinaj shkruan se në takim diskutua në interes të rrugës euro-atlantike të të dyja shteteve, ndërsa shton se qëndrimet e përbashkëta janë në dobi të qytetarëve. 
Ndër të tjera, Haradinaj thekson se bashkëpunimi mes partive të Kosovës dhe atyre të Shqipërisë ka qenë i frytshëm në rrugën e shtet-ndërtimit, teksa shprehet se dialogu vazhdon të jetë i hapur.
“Bashkëpunimi ndërmjet partive politike të Kosovës me ato të Shqipërisë në të gjitha etapat e shtet ndërtimit ka qenë i frytshëm dhe në këtë aspekt, dialogu midis tyre vazhdon të jetë i hapur.
Në kontekst të këtij dialogu, prita sot në takim Kryetarët e partive opozitare Fatmir Mediun, Agron Duka, Nard Ndoka dhe Vangjel Dule me të cilët u dakorduam se bashkërendimi i qëndrimeve është në interes të dy shteteve dhe qytetarëve tanë.
Është gjithmonë kënaqësi të bisedojmë për tema të interesit të përbashkët, në të mirë të zhvillimit tonë të brendshëm dhe rrugës tonë euro-atlantike”, shkruan Haradinaj.
