Kryeministri Edi Rama ka zhvilluar sot një takim me drejtuesit e Tatimeve, ku komentoi edhe emërimin e drejtores së re të tatimeve, Delina Ibrahimi, për të cilën tha se është vetëm fillimi i një procesi për të ndryshuar të gjithë hierarkinë, duke u bazuar tek rezultati.
Ndër të tjera, kreu i qeverisë ka paralajmëuar edhe bizneset që të lëshojnë rregullisht faturat, pasi në të kundërt, sipas tij, pasojat do të jenë të rënda. Po ashtu u bëri apel që të mos e sprovojnë administratën dhe shtetin, pasi do iu mbyllen bizneset për një periudhë të gjatë.
“E mbyll me një apel për bizneset: kemi zgjedhur prej më shumë se gjashtë muajsh një qasje këshilluese, informuese, edukuese, duke mos preferuar të shkojmë te hapi i fundit pa bërë hapat e tjerë. Masa që legjislacioni parashikon për çdo biznes që nuk punon rregullisht me faturat përkatëse janë të atilla që nuk ja vlen aventura e moslëshimit të faturës.
Të mbyllet lokali apo njësi tregtare, nëse nuk lëshon kupon, për një periudhë që sjell një dëm të madh. Mos e sprovoni administratën dhe mos e sprovoni shtetin, sepse nuk do të tolerohet askush”, tha Rama.
