Presidenti i Kosovës Hashim Thaçi i ka dërguar letrën e tretë kryeministrit ende në detyrë Albin Kurtit, për emrin e mandatarit.
Ndërkohë, së fundmi ka reaguar Lëvizja Vetëvendosje.
Arbërie Nagavci ka bërë të ditur se LVV nuk e ka ndërmend t’ia propozojë Presidentit të Kosovës emrin e mandatarit për kryeministër, deri sa të përfundojë situata emergjente me epideminë COVID-19 në Kosovë.
“Ajo që është e rëndësishme sot, është koordinimi i veprimeve të të gjitha institucioneve në menaxhimin me sa me sukses të pandemisë me COVID-19. Ndërkaq, për çështjet politike do të flasim në momentin që do të krijohen kushtet, pasi të mos ketë shumë nevojë të merremi me shëndetin publik”, është shprehur ajo.
Kujtojmë se prej rrëzimit të Qeverisë Kurti më 25 mars, Lëvizja Vetëvendosje ka insistuar në shpërndarjen e Kuvendit të Kosovës dhe shpalljes së zgjedhjeve të parakohshme.
Sipas LVV-së, zgjidhja gjendet tek ky opsion.
Megjithatë, Lëvizja Vetëvendosje pretendon që edhe opsioni i shpërndarjes së Kuvendit dhe shpalljes së zgjedhjeve, duhet të presë përmbylljen e fazës së pandemisë.
