Ambasadori i Bashkimit Evropian në Shqipëri, Luigi Soreca do të takohet nesër me aleatët e kreut të PD-së, Lulzim Basha.
Njoftimi vjen vetëm një ditë pas nënshkrimit të marrëveshjes së koalicionit opozitar, ndërsa mësohet se takimi do të nisë nesër në orën 16:00 pranë zyrave të BE-së në Tiranë. Në fokus të këtij takimi do të jetë situata politike.
Partitë aleate të PD-së, LSI-ja, LZHK, PAA, PBDNJ, PDK dhe PR firmosën dje formimin e koalicionit opozitar, që sipas tyre synon krijimin e një qeverie tranzitore pa Edi Ramën kryeministër.
“Ditën e nesërme, e enjte 25 prill, ora 16:00, pranë zyrave të delegacionit të BE-së në Tiranë, krerët e LZHK, PAA, PBDNJ, PDK, PR, do të zhvillojnë një takim me Ambasadorin e Bashkimit Evropian në Shqipëri z. Luigi Soreca. Takimi ka në fokus situatën politike në vend,”-thuhet në njoftim.
