Pas dy vitesh, nuk do të jetë më në fuqi ora policore. Vendimi në fjalë u mor një ditë më parë nga Komiteti Teknik i Ekspertëve. Ora policore në vend fillonte në 23:00, deri në 06:00, dhe u vendos për të kufizuar lëvizjet e qytetarëve, për të ulur rrezikun e infektimeve. Kryetarja e Komitetit Teknik të Ekspertëve, Mira Rakacolli tha se e vetmja mënyrë për t’i dhënë fund infektimeve është vaksinimi, duke bërë me dije se ata rekomandojnë vaksinimin e të gjithë fëmijëve mbi 12-vjeç.
Sakaq, masat e tjera nuk ndryshojnë, ku mbetet në fuqi izolimi për 5 ditë për personat e infektuar, përdorimi i maskës në vendet e mbyllura, test PCR ose pasaportë vaksinimi për t’u futur në vendin tonë.
“Nga nga këto informacione, kuptohet që kemi situatë më të favorshme epidemiologjike edhe se 1 javë më parë. Hiqet ora policore nga ora 23:00-06:00. Niveli i masave që kërkon kjo situatë vazhdon të mbetet e tillë. Ata që janë të infektuar me Covid-19, do të qëndrojnë të izoluar për 5 ditë, nga ajo 10 ditore që ka qenë më parë.
Vaksinimi është e këshillueshme të fillojë që nga mosha 12 vjeç për të gjithë fëmijët jo vetëm për ata me sëmundje bashkëshoqëruese. Për ata që do hyjnë në Shqipëri, duhet pasaporta e vaksinimit apo testi PCR. Për ata që nuk i kanë, mbetet në fuqi izolimi siç është rekomanduar. Përjashtim bëjnë fëmijët deri në 6 vjeç. Në aeroporte do lejohen të hyjnë vetëm pasagjerët që do udhëtojnë”, tha ajo.
